Polisielid voor sy huis doodgesteek

2011-08-27 22:55

Johannesburg – ‘n Polisielid is buite sy huis in Itsoseng, naby Lichtenburg, doodgesteek, het die polisie in Noord-Wes Saterdag gesê.

Die polisiewoordvoerder brig. Thulane Ngubane het gesê die 50-jarige sers. Keneilwe Seleke het Vrydag sy huis verlaat om sy broer te besoek toe hy oorrompel is.

“Seleke se seun het sy pa van binne die huis hoor skree," het Ngubane gesê. "Toe hy by sy pa kom, het hy die drie verdagtes sien vlug.”

“Hy het sy pa met die wond in sy maag in die straat sien lê.”

Seleke se seun het hom na die Itsoseng-gesondheidsentrum geneem waar hy dood verklaar is.

Die polisie beweer die drie verdagtes het Seleke probeer beroof.

Die verdagtes is nie in hegtenis geneem nie.

Seleke was 19 jaar lid van die polisiemag.

– Volg Nuus24 op Twitter.