Polisielid skiet vrou glo in kar dood
2011-04-28 06:00
’n Polisieman het ’n vrou glo eergisteraand in haar motor buite die Kempton Park-polisiekantoor doodgeskiet nadat sy teen ’n vangwa gebots het.
Mev. Jeanette Odendaal (45) is verskeie kere op ’n kort afstand geskiet en is in haar motor dood, het die onafhanklike klagtedirektoraat (OKD), die waghond wat polisievergrype ondersoek, gister in ’n verklaring gesê.
Die 38-jarige polisieman, ’n sersant, is in hegtenis geneem en sal vandag of môre op aanklag van moord in die landdroshof in Kempton Park verskyn.
Die voorval het plaasgevind minder as twee weke nadat polisielede mnr. Andries Tatane, ’n Cope-verkiesingskandidaat, glo tydens ’n protesoptog oor dienslewering in Meqheleng, Ficksburg, doodgemaak het. ’n Groep polisielede, onder wie lt.kol. Kanathasen Mansamy, bevelvoerder van die polisie se eenheid vir openbare orde, word weens die voorval aangekla.
Die jongste voorval het volgens die OKD eergister omstreeks 20:30 gebeur.
Volgens Beeld se inligting wou Odendaal ’n klag van rusverstoring by die polisiekantoor in Monumentlaan indien. Sy het blykbaar gesukkel om te parkeer en het in die proses teen die stilstaande vangwa gebots.
’n Motorwag wat dit gesien het, het in die polisiekantoor ingehardloop en die polisielede blykbaar vertel. Die sersant het uitgestap en die vrou glo op ’n kort afstand doodgeskiet nog voordat sy uit die motor kon klim.
Hy is kort daarna gearresteer en die saak is aan die OKD oorhandig vir verdere ondersoek.
Kapt. Jethro Mtshali, polisiewoordvoerder van Kempton Park, het bevestig die vrou het in Aston Manor, net ’n paar kilometer van die polisiekantoor, gewoon.
Luidens die OKD-verklaring is dit onbekend of daar ’n woordewisseling tussen Odendaal en die sersant was.
Die sersant het blykbaar ’n geluid gehoor wat soos ’n skoot geklink het, sy vuurwapen geneem, uitgestap en die vrou doodgeskiet, lui die verklaring.
Lt.kol. Tshisikhawe Ndou, provinsiale polisiewoordvoerder, het in ’n verklaring gesê dit is in dié stadium onbekend wat presies tot die skietery gelei het.
Die DA het gesê die party is erg geskok oor die tweede voorval in twee weke waarin mense blykbaar weens polisie-optrede dood is.
Die party is bly dat die polisieman so gou ná die skietery in Kempton Park gearresteer is en dat die saak dadelik vir verdere ondersoek aan die OKD oorhandig is.
- Volg Nuus24 op Twitter.
- Beeld