Polisielede vas vir ontploffings by kitsbanke
2011-07-24 14:02
Johannesburg – Twee polisiebeamptes en ‘n man is in hegtenis geneem in verband met die onlangse OTM-ontploffings in Gauteng en KwaZulu-Natal, het die polisie en Crime Line in ‘n gesamentlike verklaring gesê.
Brig. Neville Malila, ‘n woordvoerder, sê die polisiebeamptes is Saterdagoggend in hegtenis geneem nadat die polisie ‘n man in sy huis aangekeer het.
Daar word beweer die polisielede, wat in Soweto en Protea Glen gestasioneer was, het ammunisie aan die bomaanvallers voorsien.
“Ons wil dit duidelik maak dat korrupsie in die SAPD nie geduld sal word nie. Ons is geskok dat ons eie mense met kriminele aktiwiteite betrokke kon wees en ons sal nie huiwer om hulle in hegtenis te neem nie,” het hy gesê.
Malila sê die polisie vermoed die man was verantwoordelik vir die polisiereservis konst. Busisiwe Mehlwana se dood. Mehlwana is vroeër vandeesmaand tydens ‘n OTM-ontploffing by ‘n vulstasie in Pimville, Soweto, doodgeskiet.
Polisie het die man ook geïdentifiseer as een van die vier mans wat op kameras vasgevang is terwyl hulle ‘n kitsbank in Vryheid, KwaZulu-Natal, opgeblaas het.
Volg Nuus24 op Twitter.
- SAPA