Polisielede agterlosig met wapens
2011-10-19 09:08
Kaapstad – Polisiebeamptes los hul vuurwapens in badkamers en motors, of laat dit rondlê in hul kantore en huise sonder om dit in kluise toe te sluit.
Dié bekentenis is vervat in die skriftelike antwoorde wat genl. Bheki Cele, nasionale polisiehoof, en sy topbestuur Dinsdag aan die parlementêre portefeuljekomitee oor polisie voorgelê het.
Luidens die antwoorde is interne tugstappe ook net teen ’n skrale 90 polisiebeamptes ingestel vir die 1 335 vuurwapenverliese wat in die 2010-’11-boekjaar aangemeld is. Dit beteken minder as sewe beamptes word aanspreeklik gehou vir elke 100 polisiewapens wat verloor of gesteel is.
Dit is voorts onbekend of enige beampte strafregtelik vir bogenoemde wapenverliese vervolg is.
Die statistieke toon beamptes verloor hul wapens selde tydens die uitvoering van hul pligte. Die meeste van die wapenverliese kan eerder aan agterlosigheid toegeskryf word:
– Net 28 van die 1 335 wapens is ten tyde van polisiewerk verloor of gesteel.
– Altesaam 191 is na-ure in rooftogte in townships afgevat.
– Altesaam 96 wapens is uit beamptes se huise gesteel waarvan 4 nie veilig in ’n kluis toegesluit was nie.
– Dertien is uit ’n polisievoertuig gesteel en 12 uit ’n private voertuig.
– Nog 30 het uit kantore of pakkamers weggeraak.
– Altesaam 103 het met skofruilings en inspeksies verdwyn.
– Sewe is in badkamers en toilette gesteel.
– Altesaam 43 beamptes het hul wapens bloot van hul lyf verloor.
– Minstens 9 wapens is nie ingedien nadat ’n beampte uit die polisie bedank het nie.
– Die res van die wapens (786) is verlore op maniere “wat nog nie geklassifiseer is nie”.
Dit het voorts uitgekom minstens 117 polisiedossiere het in dieselfde boekjaar weggeraak. Interne tugstappe is gevolglik teen 12 beamptes ingestel en nog 11 is strafregtelik vervolg.
Die polisie se nuwe speurhoof, genl.maj. Vinesh Moonoo, het gesê talle dossiere raak by die howe weg, maar hy het ook erken die polisie se argiefstelsel is “chaoties”. “Daar is ’n moratorium op die vernietiging van dossiere en ons het net nie meer plek nie.”
Cele het in ’n stadium by parlementslede gekla omdat die howe herhaaldelik borgtog toestaan aan verdagtes wat met stringe ernstige geweldsmisdade verbind word. Hy het talle voorbeelde opgenoem en geprotesteer: “Soos hulle in Afrikaans sê – ons is gatvol (daarvoor).”
Volg Nuus24 op Twitter
- Volksblad