Polisiekaptein steel glo dossier
2011-10-13 12:39
Durban – 'n Polisieman het in die Chatsworth-landdroshof in Durban verskyn nadat sy glo 'n dossier gesteel het, het die polisie in KwaZulu-Natal gesê.
Die polisiekaptein, wat aan die Bayview-polisiekantoor verbonde is, is Woensdag in hegtenis geneem nadat dit aan die lig gekom het dat sy wou verhoed dat haar kollegas in hegtenis geneem word en toe die dossier gesteel het, het lt. kol. Vincent Mdunge, polisiewoordvoerder, gesê.
Die aanklag hou verband met 'n polisie-operasie wat in Julie gehou is. Twee polisiebeamptes het 'n klopjag op 'n huis uitgevoer nadat hulle 'n wenk ontvang het oor dwelms wat in 'n huis gehou word.
Die polisiebeamptes het glo R2 500 in omkoopgeld ontvang van 'n man wat vermoedelik dagga verkoop het en sy selfoon gesteel. 'n Saak is by die kaptein by die Bayview-polisiekantoor aanhangig gemaak.
Sy het die beamptes beveel om die geld terug te gee en het na bewering die dossier gesteel. Sy staan tereg op aanklag van regsverydeling en is op borgtog van R500 vrygelaat.
"Die twee polisiebeamptes het skuldig gepleit toe hulle in Julie in hegtenis geneem is. Hulle gaan op 18 Oktober terug na die Chatsworth-landdroshof vir vonnisoplegging," het Mdunge gesê.
Die kaptein verskyn weer op 20 Oktober in die hof.
– Volg Nuus24 op Twitter
- SAPA