Polisiehoof moet loop, eis DA
2011-06-20 09:11
Kaapstad - Die nasionale polisiehoof, genl. Bheki Cele, moet waai en gou ook, eis die DA.
Dianne Kohler Barnard, die party se woordvoerder oor polisie, het Sondag in ’n verklaring gesê dit is hoog tyd dat Cele se loopbaan as polisiehoof beëindig word.
Haar reaksie kom nadat die openbare beskermer, adv. Thuli Madonsela, in nóg ’n verslag bevind het Cele het onwettig opgetree toe hy ’n huurooreenkoms met Roux Shabangu, omstrede eiendomsontwikkelaar (en na bewering ’n vriend van Cele) aangegaan het.
Haar nuutste verslag handel oor ’n huurooreenkoms vir polisiekantore in Durban.
In die eerste verslag wat Madonsela oor die kwessie opgestel het, is bevind dat Cele, sowel as die minister van openbare werke, Gwen Mahlangu-Nkabinde, hulle aan wangedrag skuldig gemaak het betreffende die huur van ’n nuwe polisiehoofkwartier in Pretoria.
In die tweede verslag, wat aan die Sunday Times gelek is, herhaal Madonsela haar vorige bevindings en voeg by:
*Mahlangu-Nkabinde het kortsigtig opgetree deur met albei die huurkontrakte voort te gaan ten spyte van twee regsmenings dat dit ongeldig sou wees.
*Cele is skuldig aan wanadministrasie en het onwettig opgetree deur aan te dring op die R1,1miljard-ooreenkoms vir Durban-kantore, en
*Die maandelikse huur van die geboue in Pretoria en Durban is onderskeidelik met 300% opgestoot.
Volgens Kgalalelo Masibi, woordvoerder van die openbare beskermer, sal die tweede verslag eers amptelik bekend gemaak word nadat alle betrokkenes se kommentaar oor die aangeleentheid verkry is. Sy het nie ’n datum verstrek nie.
Kohler Barnard het gesê die jongste bevindings moet sekerlik die laaste druppel wees wat die emmer laat oorloop, en as Cele nie self loop nie, behoort pres. Jacob Zuma hom af te dank.
Volg Nuus24 op Twitter.