Polisiehoof: Misdadigers is diere
2009-12-08 07:02
Magdel Fourie
Johannesburg - “Moordenaars en verkragters is nie mense nie, maar diere wat nie verdien om menseregte te hê nie.”
Só het komm. Bheki Cele, nasionale polisiehoof, misdadigers gister in Johannesburg uitgekryt by die bekendstelling van die polisie se veldtog vir die feestyd.
Hy het dit in geen onseker terme nie opnuut gestel dat hoewel hy nié sê “skiet om te dood” nie, hy nogtans daarby staan dat die polisie dodelike mag teen misdaad moet gebruik.
“Misdadigers is onmenslik en harteloos. Só ’n persoon verdien nie om ’n mens genoem te word nie – eerder ’n dier.Watter mensereg kan jy hê as jy die lewe uit iemand vat, as jy ’n sesjarige kind verkrag?”
Hy herskryf nie die Grondwet nie, het hy gesê. Menseregte behoort egter volgens hom uitsluitlik aan mense. “Jy kan daarom nie menseregte vir moordenaars en verkragters bepleit nie.”
Hy het daarop gewys dat minstens 18 000 Suid-Afrikaners verlede jaar aan onnatuurlike oorsake dood is. Terwyl dié syfer nog so “onaanvaarbaar hoog” is, kan die polisie nie sê hulle het hul werk gedoen nie en moet dit (die syfer) dringend verlaag word.
Hy het daarop gewys dat die taakmag groei. Met 183 000 polisielede tans en 5 000 wat in die polisiekollege opgelei word, sal die totale mag einde vanjaar op 188 000 lede staan. Altesaam 81 000 van hulle sal volgende jaar vir die Wêreldbeker-sokkertoernooi ontplooi word.
Hy was beslis dat die polisiemag se moreel nié laag is nie, maar dat hulle gereed staan om misdadigers vas te keer.
“Enigeen wat dink Suid-Afrika is ’n hemel vir boewe, moet eerder tuis bly. Die polisie het toerusting gekry om sy werk te doen. Enigeen wat dus ’n boef met ’n vuurwapen sien, moet dodelike mag gebruik. Verstaan my mooi: Die seisoen het gedraai. Ons is siek en sat vir misdadigers. Ons het ’n punt bereik waar dit moet eindig. Dit sal nié verder so aangaan nie.”
Hy het hom ook uitgespreek oor die groot getal polisielede wat deur misdadigers doodgeskiet word. Altesaam 105 polisielede is verlede jaar aan diens dood en 107 in 2007.
“Diegene wat hulle teen inhegtenisneming verset, sal voortaan nie durf om die polisie te skiet nie. Die polisie sal dan niks anders nie as dodelike mag inspan.”
Cele het beklemtoon dat die polisie misdaad binne die mag ook sal beveg.
Altesaam 1 300 polisielede word tans in die tronk aangehou.
– Die Burger