Polisiegenerale takel nou bendes in Kaapstad

2013-02-08 09:53

Kaapstad – Die polisie in die Wes-Kaap gaan sy generale inspan om bendeleiers te teiken, is Vrydag berig.

Maj.genl. Jeremy Vearey het gesê dit sal die eerste keer wees wat generale ontplooi word in die stryd teen die bendeprobleem, berig die Cape Times.

"Die generale gaan generale aanvat wat ervaring op straatvlak het om hulle uit te roei," het hy Donderdag aan joernaliste in Kaapstad gesê.

"Dié keer gaan ons fokus op 'n naam, ons gaan 24 uur per dag op daardie persoon fokus. Dit is meedoënloos en konsekwent."

Die nuwe veldtog, genaamd Operation Combat, sal ook korrupte polisiebeamptes teiken.

Volgens die berig is die 28's-bende al langer as 200 jaar in die stad bedrywig en die polisie het min sukses gehad om hulle te ontbind.

Hanover Park op die Kaapse Vlakte is een van die gebiede wat die ergste geraak word deur bendegeweld. Verlede jaar het 11 mense in die gebied in 'n tydperk van 10 weke gesterf.
      
– Volg Nuus24 op Twitter

- SAPA