Polisiebeamptes se name op dwelmbase se betaalstate
2012-02-03 15:12
Kaapstad – Polisiebeamptes in hoë posisies se name is op die betaalstate van Wes-Kaapse dwelmbase en figure in die onderwêreld gevind, het Dan Plato, die LUR vir gemeenskapsveiligheid, Vrydag in die Cape Times gesê.
Plato sê nagklub-eienaars en ander wat besorg is oor die situasie was te bang om die polisie te kontak. Hulle het aan Plato gesê dit is aangesien polisiebeamptes betrokke is met diegene teen wie hulle aanklagtes wil bring.
“Hulle het geen vertroue in die polisie nie, aangesien daar te veel beamptes op (misdaadbase se) betaalstate is,” het hy gesê.
Die name en range van die beamptes wat glo omkoopgeld ontvang het is bekend en Plato neem die kwessie op met die bestuur van die polisie.
Plato het die beskuldigings gemaak op grond van inligting wat hy oor die stad se winsgewende en berugte uitsmyter-bedryf ingesamel het.
Dié bedryf word nou gedomineer deur ‘n nuwe maatskappy – Specialised Protection Services (SPS).
SPS, wat glo ondersteun word deur sakemanne wat volgens die polisie met georganiseerde misdaad verbind word, is begin ná die moord van Cyril Beeka in Maart.
Dit is ‘n samesmelting van twee maatskappye, waaronder een voorheen deur Beeka bestuur is.
In onlangse weke het verskeie klubeienaars Plato gekontak en gekla dat hulle geïntimideer en gedreig word deur individue wat hulle probeer dwing om spesifieke uitsmyters te gebruik.
Plato het beplan om ‘n spesiale telefoonlyn op te stel vir diegene wat geïntimideer voel deur die base van sekutiteitsmaatskappye.
– Volg Nuus24 op Twitter
- SAPA