Polisiebeamptes, prokureur vas vir moord
2011-09-11 18:55
Johannesburg – Twee polisiebeamptes en ‘n regsverteenwoordiger is in hegtenis geneem nadat hulle na bewering ‘n vermeende inbreker naby Vereeniging doodgemaak het, het die polisie in Gauteng Sondag gesê.
‘n Prokureur het Saterdag omstreeks 21:00 by sy huis in Sebokeng Sone 7 aangekom en gevind dat daar by sy huis ingebreek is, het kapt. Johannes Motsiri gesê.
Die huiseienaar het toe na sy buurman se seun gegaan en hom van die inbraak beskuldig.
“Nadat hy die polisie ingelig het, het twee beamptes aangekom en die seun ondervra. Die drie mans het hom na bewering aangerand totdat hy skuld op die misdaad beken en sy twee medepligtiges uitgewys het,” het Motsiri gesê.
Hulle het al drie die vermeende inbrekers na die Evaton-polisiekantoor geneem, waar hulle die seuns na bewering verder aangerand het. Die eerste seun is op die polisiekantoor se perseel dood kort ná hulle gearriveer het. Sy twee medepligtiges het ligte beserings opgedoen.
“In hierdie stadium weet ons nie wat hulle gebruik het om die vermeende inbrekers mee aan te rand nie,” het Motsiri gesê.
Die drie mans sal na verwagting eersdaags in die hof verskyn op aanklag van die moord.
- Volg Nuus24 op Twitter
- SAPA