Polisiebeamptes aangeval in Sasolburg
2013-01-21 11:26
Johannesburg – Twee polisiemanne is Maandag beseer tydens 'n betoging by die Zamdela- informele nedersetting in Sasolburg, het die polisie in die Vrystaat gesê.
"Dit is nou kritiek in Zamdela. Polisiebeamptes is beseer en hulle word aangeval deur die inwoners," het konst. Peter Kareli, polisiewoordvoerder, gesê.
Die betogings het Sondag begin nadat die munisipaliteit inwoners ingelig het oor nuwe planne vir die samesmelting van die Metsimaholo- en Ngwathe-munisipaliteit, het Beeld berig.
'n Polisievoertuig was vasgekeer in die modder en betogers het die beamptes in die voertuig aangeval.
"Waterkanonne en rubberkoeëls is gebruik om die betogers in bedwang te bring. Die helikopter skiet ook rubberkoeëls," het Kareli gesê.
"Die situasie is plofbaar."
Intussen het skole Maandag volgens Beeld ouers versoek om kinders te kom haal nadat 'n groep oproeriges na een van die laerskole opgeruk het.
Sowat 90 mense is Sondag in hegtenis geneem en staan tereg op aanklag van openbare geweld nadat hulle winkels in die woonbuurt geplunder het.
"Nóg mense is omstreeks 03:00 vanoggend [Maandag] in hegtenis geneem nadat hulle winkels geplunder het," het Kareli gesê.
Die getal mense wat sedert Sondag in hegtenis geneem is, is nog nie bekend nie, maar sowat 150 mense is na raming agter tralies.
Diegene wat Sondag in hegtenis geneem is sal na verwagting Maandag in die Sasolburg-landdroshof verskyn.
– Volg Nuus24 op Twitter
- SAPA
