Polisiebeamptes aangekla oor onderonsie met Winnie
2011-09-27 11:22
Johannesburg – Twee polisiebeamptes wat ‘n onderonsie met Winnie Madikizela-Mandela en haar lyfwagte gehad het, sal krimineel vervolg word, het Beeld Dinsdag berig.
Die aanklagte volg ná ‘n voorval verlede Desember waar die polisiebeamptes – ao. Jannie Odendaal en konst. Abel Twala – Madikizela-Mandela se motor gestop het.
Die polisiebeamptes het haar afgetrek aangesien die motor teen 150 km/h gejaag het.
Daar word beweer dat ‘n argument ontstaan het.
Die lyfwagte het Odendaal en Twala van intimidasie aangekla en hulle ook daarvan beskuldig dat ‘n vuurwapen op hulle gerig is.
Beeld berig Madikizela-Mandela en haar lyfwagte se teenaanklagte is laat vaar, maar die polisiebeamptes, wat geskors is, sal krimineel aangekla word.
Die aanklaer Kholeka Gcaleka van die Nasionale Vervolgingsgesag het Maandag gesê die departement van openbare vervolging het “genoeg bewyse” om die polisiebeamptes te vervolg.
Volg Nuus24 op Twitter.
- SAPA