Polisiebeampte, vrou dood ná hof-ontsnapping
2011-05-12 21:06
Bloemfontein - ‘n Polisiebeampte en ‘n vrou wie se motor gekaap is deur gevangenes wat uit die Harrismith-landdroshof ontsnap het, is dood ná dié ontsnapping.
Die polisiebeampte is in die kop geskiet en ‘n ander polisiebeampte is geskiet en is in ‘n ernstige toestand nadat die vyf mans Donderdag omstreeks 10:30 ontsnap het.
Kapt. Dennis Adrio, nasionale polisiewoordvoerder, het gesê een van die gevangenes wat ontsnap het, het later gesterf in ‘n ongeluk in Qwaqwa waarby die gekaapte motor, met die vrou steeds binne-in, betrokke was.
Die vrou is ernstig beseer in dié ongeluk en het later in ‘n hospitaal in Qwaqwa gesterf.
Volgens die polisie het die vyf mans, wat op aanklagte van gewapende roof teregstaan, die polisiebeampte wat saam met hulle van ‘n aanhoudingsel na die hof gestap het, oorweldig.
Hulle het hom in die kop geskiet en ‘n ander polisiebeampte, wat ondersoek gaan instel het, in die bors geskiet.
Adrio sê die mans het toe die vrou se Mercedez Benz buite die hof gekaap en van die toneel gevlug, met haar as gyselaar op die agterste sitplek.
Die polisie het die voertuig naby Qwaqwa gesien en agtervolg. Die bestuurder van die gekaapte motor het naby Bluegumbosch beheer daaroor verloor.
Die bestuurder is dood in die ongeluk, terwyl die vier ander ontsnapte gevangenes in die hospitaal opgeneem is.
Die vrou is ook beseer en in die hospitaal opgeneem, waar sy later gesterf het. Die polisie het twee R5-jaggewere en ‘n pistool, wat by die polisie gesteel is, op die toneel teruggevind.
Die polisiebeampte wat in die kop geskiet is, het in die hospitaal gesterf. Die polisiebeampte wat in die bors geskiet is, is in ‘n ernstige toestand.
- Volg Nuus24 op Twitter
- SAPA
