Polisiebeampte vas vir roof
2011-08-15 17:23
Johannesburg – ‘n Polisiekonstabel en drie ander mans is Maandag in hegtenis geneem in verband met ‘n gewapende rooftog in Mthatha, het die polisie in die Oos-Kaap gesê.
Volgens kapt. Ernest Sigobe het drie gewapende mans na bewering by ‘n sakeperseel ingestorm en geld geëis terwyl ‘n ander man buite in ‘n motor gewag het.
“Hulle het geld geëis en die mense in die winkel van kontant en selfone beroof, waarna hulle in ‘n groen Almera-voertuig van die toneel gevlug het,” het hy gesê.
Die polisie is gekontak en die Mthatha-blitspatrollie en die eenheid teen georganiseerde misdaad het die voertuig agternagesit. Die voertuig is ongeveer 10 kilometer buite Mthatha vasgekeer en vier mans tussen die ouderdomme van 23 en 48 is in hegtenis geneem.
“’n Klein hoeveelheid kontant, sewe selfone en drie 9mm-handgewere is in hul besit gevind. Een van die handgewere is as ‘n SAPD-vuurwapen uitgeken.”
Een van die mans wat in hegtenis geneem is, was ‘n konstabel wat by Zamuxolo naby Mt Fletcher gestasioneer was.
“Die polisie ondersoek die moontlikheid dat hulle verbind kan word met ander soortgelyke sake.”
- Volg Nuus24 op Twitter
- SAPA