Polisiebeampte skuldig aan moord op sy vrou
2012-09-03 22:00
Pretoria – 'n Polisiebeampte wat sy vrou met sy dienspistool doodgeskiet het, het Maandag aan die Pretoriase hooggeregshof gesê hy kon nie meer haar mishandeling hanteer nie.
Regter George Webster het Godfrey Boitumelo Modikoe (34), 'n voormalige polisiebeampte, skuldig bevind weens die moord op sy vrou in Desember 2010.
Tshepiso Mafatle is een keer in haar gesig geskiet en het by Modikoe se familiehuis in Klipfontein, buite Pretoria, gesterf.
Mafatle en haar twee kinders het by Modikoe se ma gewoon nadat hy uitgetrek het oor hul onstabiele verhouding.
Modikoe het skuld op 'n aanklag van moord erken en aan Mafatle se familie om verskoning gevra vir hul verlies en die lyding wat hy hulle veroorsaak het.
Modikoe sê hy het geweet wat hy doen toe hy sy vrou geskiet het, hoewel hy erg depressief, gefrustreerd en seer gevoel het oor hul bitter geskiedenis. Hy was ook verward oor sy vrou se gewelddadige houding.
Hy word sedert 2007 vir depressie behandel.
"Ek het nie beplan om haar te skiet of om enigeen daardie spesifieke dag dood te maak nie. Die voorval was nie beplan nie en my ouma, my beste vriend en sy vrou het gesien hoe ek haar skiet.
Die verhoor is tot 21 September uitgestel.
– Volg Nuus24 op Twitter.
- SAPA
