Polisiebeampte, rower sterf in skietery
2011-12-12 16:56
Johannesburg – ‘n Polisiebeampte en ‘n rower is Maandag dood in ‘n skietery ná ‘n rooftog by ‘n winkel in Wentworth, suid van Durban, het die polisie in KwaZulu-Natal gesê.
“Drie mans het die personeel van ‘n winkel omstreeks 09:00 van ‘n onbekende hoeveelheid kontant en ‘n selfoon beroof,” het kol. Jay Naicker gesê.
“Die mans het te voet gevlug en in ‘n minibus-taxi, wat weggery het, geklim.”
Inwoners het twee polisiebeamptes in die gebied in kennis gestel van die rooftog. Hulle het toe die taxi agternagesit.
Die beamptes het naby die Wentworth-hospitaal die bestuurder van die taxi beveel om af te trek en die rowers beveel om oor te gee.
“Die rowers het op die beamptes losgebrand en een van hulle in die nek getref,” het hy gesê.
“Die polisie het teruggeskiet en vir bystand gevra.”
Een rower is op die toneel doodgeskiet, terwyl die polisiebeampte wat in die nek geskiet is later by die plaaslike hospitaal dood is.
Volgens Naicker het die polisie een man in hegtenis geneem en op die toneel beslag op ‘n vuurwapen gelê.
“Die derde rower het gevlug en word nog gesoek.”
Die man sal na verwagting eersdaags in die Wentworth-landdroshof verskyn.
- Volg Nuus24 op Twitter
- SAPA