Polisiebeampte in hof wat op kollega skiet
2011-12-05 18:58
Johannesburg – ‘n Polisiekonstabel het Maandag in die hof verskyn op aanklag van poging tot moord nadat hy skote op ‘n vroulike konstabel afgevuur en haar beseer het, het die polisie in die Wes-Kaap gesê.
Die landdroshof op Leeu-Gamka het die verhoor van Graham Wicomb (26) tot Donderdag uitgestel. Hy bly in aanhouding.
“Wicomb is Vrydag in hegtenis geneem nadat hy op sy kollega, wat van diens af was, geskiet het in 'n parkeergebied in Aalwynstraat,” het kapt. Bernadine Steyn gesê.
“Die verdagte, wat ook van diens af was, het sy Toyota Tazz langs haar parkeer en haar te voet genader.”
Hy het na bewering sy amptelike vuurwapen gebruik om op haar te skiet. Die deur van haar motor is aan die bestuurderskant beskadig. Sy het skaafwonde aan haar bene opgedoen, het Steyn gesê.
“Hy het haar toe uit die voertuig getrek en nog ‘n skoot afgevuur, maar dit het haar nie getref nie. Hy het haar toe na ‘n nabygeleë braai-area geneem om met haar te praat.”
Die beseerde konstabel is intussen uit die hospitaal ontslaan.
Volgens Steyn is ‘n interne polisie-ondersoek geloods. Wicomb se vuurwapen is vir forensiese toetse geneem.
- Volg Nuus24 op Twitter
- SAPA