Polisiebeampte in Welkom vermoor

2012-11-20 08:18

Bloemfontein – 'n Polisiebeampte se lyk is in 'n parkie agter sy kantoor in Welkom gevind, het die polisie Dinsdag gesê.

Sers. Puleng Motsoeneng, polisiewoordvoerder, het gesê die 44-jarige kaptein het 'n steekwond aan sy nek gehad.

Hy het ook erge kop- en kniebeserings opgedoen, wat 'n aanduiding kan wees dat sy aanvallers oor hom gery het. Die kaptein was die afgelope naweek aan diens.

Die polisieman se vrou het hom Sondagaand om 19:52 laas gesien.

Verbygaande polisiebeamptes, wat op patrollie was, het die verlate voertuig in die parkie gesien en vasgestel dat dit 'n polisievoertuig is. Die beampte se lyk het agter die voertuig gelê.

Die motief vir sy moord is nie bekend nie en niemand is tot dusver in hegtenis geneem nie.

– Volg Nuus24 op Twitter

- SAPA