Polisiebeampte beboet, geskors oor seksvideo

2013-02-07 10:53

Kaapstad – 'n Polisiebeampte is 'n boete van R3 000 en 'n opgeskorte vonnis opgelê nadat hy 'n video geneem het van hoe sy kollega intiem verkeer met 'n vrou.

'n Regter in die Wes-Kaapse hooggeregshof het bevind dat konst. Jaede Fillies "roekeloos" opgetree het op 15 Junie 2010.

Hy is ses maande tronkstraf opgelê, wat opgeskort is vir drie jaar, op voorwaarde dat hy hom nie skuldig maak aan 'n soortgelyke oortreding in dié tydperk nie.

Fillies en ao. Theodore Syster is vrygespreek van bewerings dat hulle 'n 29-jarige vrou in 2010 verkrag en na die Elsiesrivier-polisiekantoor geneem het.

Syster is daarvan beskuldig dat hy die vrou in die toilet verkrag het, terwyl Fillies die daad met 'n selfoonkamera opgeneem het.

Fillies het nie die voorval aangemeld nie en het die video op sy selfoon gehou. Hy is skuldig bevind op aanklag van crimen injuria.

'n Interne tugverhoor is gehou en Fillies is 'n boete van R500 opgelê en hy is drie maande geskors.

Regter Patricia Goliath het Woensdag gesê sy het in ag geneem dat Fillies in volle uniform geklee was toe die voorval plaasgevind het. Dit is glo ook sy eerste oortreding en hy het geen hangende sake teen hom nie.
       
– Volg Nuus24 op Twitter

- SAPA