Polisie waak by regses se verskyning
2012-12-18 10:59
Bloemfontein – 'n Sterk polisie- en mediateenwoordigheid het Dinsdag by die Bloemfontein-landdroshof geheers voor die verskyning van vier vermeende regse ekstremiste.
Die polisie het vroeër almal gevra om hof 19 te verlaat sodat hulle deursoek kan word.
Landdros Piet Bester het almal toe weer gevra om te hof te verlaat, omdat die saak eers later in die dag sal begin.
Die moontlikheid is ook genoem dat die saak na 'n ander hof verskuif kan word sodat die Bloemfontein-landdroshof se normale bedrywighede nie ontwrig word nie.
Brig. Billy Jones, polisiewoordvoerder in die Vrystaat, het gesê die vier mans, tussen die ouderdomme van 40 en 50, sal op aanklag van verraad en twee ander aanklagte, wat verband hou met terrorisme, in die hof verskyn.
Minstens twee van die vier mense wat in hegtenis geneem is vir beweerde terreurdade, is lede van die nuutgestigte Federale Vryheidsparty, is bevestig.
Francois Cloete, nasionale sekretaris van die party, het gesê hul president en 'n lid van hul uitvoerende raad is in Mookgopong (Naboomspruit), Limpopo, in hegtenis geneem.
Cloete het die Federale Vryheidsparty beskryf as 'n "party wat homself beywer om namens die Afrikaner- en Boerevolk 'n deelstaat te verkry".
Die party het gesê hy weet niks van die beweerde komplot nie.
Intussen het die polisie gesê nóg in hegtenisnemings word verwag nadat die vier aangekeer is.
– Volg Nuus24 op Twitter
- SAPA
