Polisie waak buite skool in Roodepoort
2011-10-20 13:19
Johannesburg – Die polisie is gevra om die gebied om Hoërskool Die Burger in Roodepoort, waar Louise de Waal ontvoer is, te patrolleer, het die Gautengse departement van onderwys Donderdag gesê.
"Ons het die polisie versoek om gereeld verby die skool te ry om groter polisiesigbaarheid te bewerkstellig en potensiële misdadigers af te skrik," het Charles Phahlane, woordvoerder van die departement, gesê.
Dít volg nadat 'n man Woensdag in hegtenis geneem is nadat hy 'n 18-jarige meisie buite die skool wou ontvoer.
Die meisie het op 'n sypaadjie naby die skool gesit toe die 21-jarige man haar met 'n skroewedraaier gedreig en haar in die kattebak van sy motor wou forseer.
'n Sekuriteitswag by die skool het gesien wat gebeur en het die polisie in kennis gestel.
Die polisie ondersoek of die man by ander sake in die gebied betrek kan word.
Phahlane het gesê die provinsiale departement van onderwys het ná die voorval 'n berader na die skool gestuur om met die meisie te praat
"Ons is bly dat die polisie die persoon vinnig in hegtenis geneem het. Ons hoop die polisie kan lig werp op wie die persoon is en hoekom die skool geteiken word."
Die man verskyn Vrydag in die Roodepoort-landdroshof.
Phahlane het gesê Barbara Creecy, provinsiale minister van onderwys, het Donderdag 'n program vir skoolpatrollies geloods.
Skole sal afhangend van hul "risikoprofiel" van sekuriteit voorsien word.
Louise is verlede week ontvoer. Haar lyk is dieselfde dag op 'n plaas in Magaliesburg gevind.
Die sogenoemde "Sondag-verkragter" Johannes Jacobus Steyn het homself aan die polisie oorgee ná dié misdaad. Sy saak is tot Desember uitgestel.
– Volg Nuus24 op Twitter
- SAPA