Polisie verjaag onwettige stakers buite Amplats

2012-09-19 13:02

Johannesburg – Die polisie het rubberkoeëls en traangas gebruik om ‘n groep mense wat Woensdag naby Anglo American Platinum (Amplats) in Rustenburg saamgekom het uiteen te jaag, het ‘n woordvoerder gesê.

“Die polisie het mense uiteengejaag wat probeer het om onwettig saam te kom. Soos ons gesê het, ons gaan nie enige onwettige saamtrekke verduur nie,” het kapt. Dennis Adriao gesê.

“Die polisie het traangas en skokgranate gebruik en rubberkoeëls is by die [nabygeleë] plakkerskamp gebruik.”

Mpumi Sithole, woordvoerder vir Amplats, het gesê: “Ek kan bevestig dat [die polisie] ‘n groep mense wat onwettig by die Sondela- informele nedersetting saamgekom het uiteengejaag het.

“Ons weet nie hoekom die mense daar saamgekom het nie en ons kan nie bevestig of hulle van ons werknemers was nie. Soos gister [Dinsdag] berig is, is ons myne in werking...”

Regeringsministers het verlede week gesê die regering sal nie meer geweld, dreigemente en intimidasie wat in die mynsektor plaasvind verdra nie.

– Volg Nuus24 op Twitter

 

- SAPA