Polisie skiet veiligheidswag ná bankroof
2012-12-13 07:16
Johannesburg – 'n Veiligheidswag is by 'n bank in Bothaville in die Vrystaat doodgeskiet, het die Onafhanklike Polisie-ondersoekdirektoraat (Opod) Woensdag gesê.
Die skietery het Maandag plaasgevind, ná die polisie nuus ontvang het oor rowers in 'n Absa-bank, het Moses Dlamini, 'n woordvoerder, in 'n verklaring gesê.
"Die polisie het hulle na die toneel gehaas; terselfdertyd het veiligheidswagte van Fidelity in Welkom ook na die toneel gegaan.
"Die veiligheidswagte het glo hulle voertuig agter die bank parkeer, terwyl die polisie by die hoofingang voor die bank parkeer het."
Hy het gesê beide die polisie en die veiligheidswagte was gewapen.
"Die veiligheidswagte het die hoofingang van verskillende hoeke genader."
'n Wag het glo twee polisiebeamptes genader wat agter polisiemotors gestaan het. Hulle het na hom geroep om te stop, het Dlamini gesê.
"Die veiligheidswag het na bewering nie gestop nie, maar steeds in die rigting van die polisie gehardloop met 'n aanvalsgeweer in sy hand, al het hulle 'n waarskuwingskoot afgevuur."
Die polisiebeamptes het hom geskiet en hy is op die toneel dood. Opod het beheer oor die toneel en die ondersoek oorgeneem.
Daar was geen onafhanklike getuies op die toneel nie.
"Niemand is in hegtenis geneem nie. Die ondersoek duur voort."
– Volg Nuus24 op Twitter.
- SAPA
