Polisie skiet nóg rowers dood
2009-10-23 10:37
Durban – Twee vermeende rowers is deur die polisie doodgeskiet toe hulle glo probeer het om by ‘n huis in Mbazwana, KwaZulu-Natal in te breek, het die polisie Vrydag gesê.
“Die twee verdagtes is deur die polisie doodgeskiet toe hulle Donderdag by ‘n huis probeer inbreek het,” het kapt. Jabulani Mdletshe, polisiewoordvoerder, gesê.
Na bewering het drie gewapende mans toegang tot die huis verkry en verskeie items gesteel insluitende ‘n vuurwapen.
“Die mans het van die toneel gevlug en die inwoners het die polisie gekontak. Die polisie het die verdagtes agterna gesit,” het Mdletshe gesê.
Die mans het glo op die polisie losgebrand. Die polisie het teruggeskiet en twee van die verdagtes noodlottig gewond.
Die derde verdagte is in ‘n kritieke toestand na die hospitaal geneem.
“Al die gesteelde goedere is teruggevind behalwe vir die vuurwapen. Die verdagtes het die wapen glo iewers in ‘n veld gegooi,” het Mdletshe gesê.
Nuus24 het vroeër berig dat een van drie vermeende rowers Vrydagoggend tydens ‘n wilde skietery tussen hulle en die polisie by ‘n huis in Fontainebleau doodgeskiet is.
Volgens insp. Bokkie Keulder, polisiewoordvoerder op die toneel, het die mans die huis omstreeks 08:00 probeer roof.
–Sapa