Polisie skiet met rubberkoeëls op stakende plaaswerkers
2013-01-16 16:52
Kaapstad – Betogende plaaswerkers in die Wes-Kaap is Woensdag deur rubberkoeëls in Robertson beseer, het Mawubuye, die forum vir grondhervorming, gesê.
Denia Jansen, woordvoerder van die Forum, sê die polisiekaptein in Robertson het glo ingestem dat plaaswerkers Woensdagoggend ‘n vreedsame betoging in Nkqubela hou. Meer as 800 werkers het deelgeneem aan die betoging.
“Kort nadat die betoging begin het, het ander polisiebeamptes [met rubberkoeëls] op die betogers begin skiet en hulle gedwing om terug te gaan na hul gemeenskappe,” het sy gesê.
Kapt. Marshall Klaasten, die stasiebevelvoerder op Robertson, het hierdie vertelling van die gebeure ontken en het gesê daar is nooit toestemming gegee nie.
Volgens hom het betogers ‘n besige verkeersirkel in die dorp versper en hy het hulle gevra om te skuif sodat die motors kan deur beweeg.
Die groep het geweier en hy het ‘n gesprek met sy kollegas gehad. Hy het uiteindelik teruggekeer na die plaaswerkers en aan hulle gesê hulle mag nie betoog nie.
Die onderhandelinge het van 06:20 tot 10:05 geduur. Hulle het ooreengekom om terug te stap na die informele nedersetting. Toe hulle binnegaan het hulle begin om klippe uit hul huise na die polisie te gooi. Daar was baie mense van die publiek in die omgewing,” het Klaasten gesê.
Hy sê rubberkoeëls is afgevuur om burgerlikes te beskerm.
Jansen sê die forum het die menseregtekommissie gekontak om “die saak te ondersoek”.
– Volg Nuus24 op Twitter
- SAPA
