Polisie skiet glo krokodil dood
2009-10-26 05:30
Pietermaritzburg – ‘n Krokodil van sowat 3m is doodgeskiet nadat hy uit sy hok by ‘n diereplaas in Copesville ontsnap het.
Volgens die aanlyn-koerant, The Witness, het ‘n polisieman die krokodil in die kop en lyf geskiet nadat dié reptiel uit die Crafty Duck ontsnap het.
Na bewering het vuurwerke wat by ‘n naby geleë oord afgevuur is die dier verskrik. Hy het glo deur ‘n gat in die heining ontsnap voordat die polisie op hom afgekom het.
Mark Enslin, ‘n kundige op die gebied van reptiele, meen dit was onnodig om die dier te skiet. “Ons kon gereël het om hom te vang. Hy sou niemand enige skade aangedoen het nie,” het Enslin hartseer gesê.
Die krokodil was sowat 25 jaar oud en het 147kg geweeg. Hy is kort na geboorte van ‘n plaas gered waar die eienaar hom wou laat uitsit het.
Die polisie het die voorval bevestig.
- The Witness