'Polisie se statistieke is verkeerd'
2010-07-16 08:05
Kaapstad - Die polisie se statistieke vir die getal plaasaanvalle en -moorde vir die 2008-’09-boekjaar is verkeerd.
Nathi Mthethwa, minister van polisie, het Donderdag erken die statistieke is “per ongeluk” gedupliseer uit die polisie se verslag vir die 2006-’07-boekjaar.
Tot 794 plaasaanvalle waarin 86 mense vermoor is, is in dié tydperk by die polisie aangemeld.
Dieselfde statistieke het egter twee jaar later in die verslag vir die 2008-’09-boekjaar opgeduik.
“Die polisie en die minister betreur die fout,” het Mthethwa in antwoord op ’n geskrewe parlementêre vraag van Dianne Kohler Barnard, DA-LP en -woordvoerder oor polisie, gesê.
Mthethwa kon nie antwoord op wat die korrekte statistieke vir die 2008-’09-boekjaar is nie, aangesien die polisie sedert 2007 nie meer afsonderlik boekhou van die hoeveelheid aanvalle en moorde op plase nie. Dit word sedertdien by die statistieke vir moorde en gewapende rooftogte ingereken.
Kohler Barnard het by navraag vuur gespoeg. Sy bevraagteken nou die geloofwaardigheid van die ander misdaadstatistieke wat in die 2008-’09-verslag verskyn.
“Ek het nog nooit tevore van so iets gehoor nie. As die polisie dié syfers bloot uit ’n vorige verslag kon knip en plak, hoe weet ons dit gebeur nie met die ander statistieke nie?”
Volgens haar laat dit ook bedenkinge ontstaan oor die ouditeur-generaal (OG) se kantoor wat veronderstel is om elke departement se jaarverslag vir foute en ongerymdhede te fynkam.
“Hoe kon die OG dit misgekyk het?”
Kohler Barnard wou onlangs in ’n parlementêre vraag aan Mthethwa weet hoekom die polisie nie meer afsonderlike statistieke vir plaasaanvalle en -moorde hou nie. Dié vraag is nog nie beantwoord nie, het sy Donderdagaand gesê.
- Die Burger