Polisie se nalatigheid vertraag The Spear-saak

2012-06-28 13:02

Johannesburg – Die saak teen twee mans wat daarvan aangekla is dat hulle ‘n skildery van pres. Jacob Zuma, waarop sy geslagsdele ontbloot is, geskend het, is tot 4 September uitgestel.

Landdros Johan Engelbrecht het Donderdag gal gebraak nadat die aanklaer Frederick Bukes gekla het dat die ondersoekbeampte nie aan enige van die vereistes van die ondersoek voldoen het nie, wat daartoe gelei het dat die saak uitgestel is.

“Dit kan nie verdra word nie,” het Engelbrecht gesê.

Hy het die polisie se versuim om hul werk te doen ‘n “vorm van polisie-brutaliteit” genoem, aangesien die mense wat in aanhoudingselle wag se sake aangehoor kan word in die tyd wat hulle so mors.

Hy het bygevoeg dat hy nie sal huiwer om die saak van die rol te verwyder as die polisie teen die volgende datum steeds nie gereed is nie.

Barend la Grange en Louis Mabokela het geduldig gewag vir die sitting om te begin, met geen van die skares en luide krete wat vroeër buite die hof was nie.

Die twee is daarvan beskuldig dat hulle die kunstenaar Brett Murray se skildery The Spear op 22 Mei by die Goodman-galery geskend het.

– Volg Nuus24 op Twitter
 

- SAPA