Polisie se R500 miljoen huurkontrak gevries
2010-08-18 00:04
Die minister van Openbare Werke, Jeff Doidge, het Dinsdag in die parlement gesê, die transaksie vir die huur van nog ‘n gebou vir R500 miljoen vir ‘n Polisie-hoofkwartier is gevries.
Dit volg nadat die Vryheidsfront Plus reeds op 2 Augustus 2010 die Openbare Beskermer versoek het om die departement van Openbare Werke (DOW) en polisiekommissaris, genl. Bheki Cele, se huurkontrak van R500 miljoen vir ‘n gebou van Roux Shabangu, te ondersoek.
“Die feit dat die minister die kontrak gevries het, word verwelkom. Die Openbare Beskermer het die Vryheidsfront Plus skriftelik ingelig dat sy ondersoek instel. Ons verwelkom ook die aankondiging van president Zuma dat die Spesiale Ondersoek Eenheid ook die Polisie sal ondersoek vir korrupsie," sê Pieter Groenewald, hoofwoordvoerder vir Polisie van die Vryheidsfront Plus.
Volgens Groenewald moet hierdie ondersoek egter nie net handel oor die tydperk van Jackie Selebi, voormalige polisiekommissaris, nie maar moet ook alle diensverskaffer-ooreenkomste wat aangegaan is sedert die aanvang van gen. Cele se termyn in Junie 2009, insluit,”
“Die Vryheidsfront Plus het die Openbare Beskermer versoek om nie net ondersoek te doen na die oortreding van reëls en regulasies oor tenders nie, maar om ook ondersoek te doen of ‘n tweede gebou, wat ook moet dien as hoofkantoor vir die Polisie, werklik nodig is. ‘n Tweede gebou is onnodig en ‘n vermorsing van belastinggeld. Die R500 miljoen kan eerder aangewend word om meer polisielede aan te stel en sigbare polisiëring te verhoog,” het Groenewald gesê.