'Polisie' ry weg met man se motor

2013-02-04 13:59

Johannesburg – 'n Man se motor is na bewering Maandag deur 'n groep boewe gesteel wat hulle as metropolisielede voorgedoen het, het die Johannesburgse metropolisie gesê.

Supt. Edna Mamonyane het gesê die mans, wat polisie-uniforms gedra het, het die motoris op die M1 tussen Marlboro- en Grayston-weg afgetrek.

Een van die mans het weggery in sy silwer VW Polo, terwyl die ander die toneel verlaat het in 'n wit Mazda-bakkie. Die motoris is langs die pad agtergelaat. Hy het 'n ander groep metro-polisiebeamptes se aandag getrek, en aan hulle gesê wat gebeur het.

"Die polisie het die voertuie gewaar en hulle begin jaag. Die voertuie het daarna na Alexandra afgedraai," het sy gesê.

Die motors is steeds soek.

– Volg Nuus24 op Twitter.

- SAPA