Polisie ry kaping in die wiele

2012-11-27 09:15

Johannesburg – Die polisie het ses mans in hegtenis geneem terwyl hulle ‘n vragmotor op die R25 in Olifantsfontein, suid van Pretoria, wou kaap.

Lt.kol. Katlego Mogale sê die polisie, wat ‘n wenk opgevolg het, het gesien hoe die verdagtes probeer het om ‘n koeriervragmotor af te trek. Twee van hulle het hulself as polisiebeamptes voorgedoen.

Toe die polisie die mans genader het, het een van hulle op die beamptes begin skiet.

“Die polisie het teruggeskiet en hom in die boud gewond. Hy is vir mediese aandag na ‘n hospitaal geneem en is onder polisiebewaking.”

Mogale sê die polisie het beslag gelê op ‘n vuurwapen en drie voertuie; ‘n Isuzu, Volkswagen Golf en ‘n Polo.

Die mans sal binnekort in die hof verskyn op aanklagte van poging tot gewapende roof, poging tot moord, die besit van ‘n ongelisensieerde vuurwapen en die feit dat hulle hulself as polisiebeamptes voorgedoen het.

Volg Nuus24 op Twitter  

- SAPA