Polisie red vermiste seun
2010-06-02 21:34
Johannesburg – Die polisie het Dinsdag ‘n huis in Katlehong binnegestorm om ‘n sewejarige seun te red wat verlede week by sy skool ontvoer is, het ‘n woordvoerder Woensdag gesê.
Volgens Musa Zondi, Valke-woordvoerder, het die polisie die huis in die Oos-Randse informele nedersetting Dinsdag binnegestorm.
Die polisie het reeds vyf dae lank na die seun gesoek nadat hy verlede week deur ‘n 29-jarige vrou ontvoer is.
“Die seun het dadelik in die arms van ‘n polisiebeampte gespring toe hy vrygelaat is,” het Zondi gesê.
Die seun is glo getraumatiseerd deur die ervaring en sal nou sielkundige behandeling ontvang.
Na bewering is die vrou wat die seun ontvoer het in hegtenis geneem en aangekla van ontvoering. ‘n 52-jarige vrou is ook in hegtenis geneem vir haar rol in die ontvoering.
Beide vroue sal Donderdag in Benoni in die landdroshof verskyn.
Volg Nuus24 op Twitter.
- SAPA