Polisie patrolleer by skool
2010-09-22 13:40
Durban - Die polisie in KwaZulu-Natal het Woensdag ‘n skool in Mtubata, wat deur die ondewysdepartement gesluit is ná gewelddadige betogings en vandalisme, se perseel gepatrolleer.
“Die polisie monitor die skool om seker te maak geen sulke voorvalle gebeur in die gebied nie,” het kol. Jay Naicker gesê.
Volgens hom sal die polisie aanhou om hier te patrolleer totdat die skool heropen word.
Die superintendent van die KwaZulu-Natalse onderwysdepartement, Cassius Lubisi, het Dinsdag gesê die skool sal gesluit bly totdat leerlinge wat verantwoordelik vir die oproeringe is, skuld beken.
Verlede Donderdag is 18 hoërskoolleerlinge in Emachibini, Mtubatuba, in hegtenis geneem nadat hulle na bewering die skool probeer afbrand het.
Hulle is van opsetlike saakbeskadiging aangekla.
Die leerlinge het na bewering gewelddadig geraak toe die skoolhoof een van die onderwysers geskors het omdat dié glo dikwels dronk by die skool opgedaag het of sommer heeltemal weggebly het.
‘n Groep van ongeveer 200 leerlinge het gehoor die onderwyser is geskors en het besluit om klasse te boikot, skoolverrigtinge te ontwrig en ‘n motor wat aan ‘n onderwyser behoort, te vandaliseer.
Hulle eis dat die onderwyser toegelaat word om terug te keer.
Die skool se administrasiegebou is volgens Lubisi tydens die stormloop aan die brand gesteek.
Streng dissiplinêre optrede sal geneem word teen die leerlinge wat skuldig bevind word.
Die woordvoerder van die departement, Mbali Thusi, het gesê die skool sal geslote bly en die matriekleerlinge skryf hul eksamens elders.
- Volg Nuus24 op Twitter
- SAPA