Polisie op soek na spoedvraat wat deur huis ploeg

2013-01-14 13:50

Johannesburg – Die polisie is op soek na die bestuurder van ‘n Jaguar XF wat deur die hekke van ‘n huis in Centurion geploeg het en grootskaalse skade aangerig het voordat die motoris weggehardloop het.

Beeld berig die voertuig het byna 10 m verder teen die motorhuis gebots en ‘n motor beskadig.

Die voorval het Sondagoggend vroeg plaasgevind.

Polisiebeamptes het ‘n leë bottel whiskey en ‘n kas bier in die Jaguar gevind.

Luidens die berig het die motoris nog 5 km sonder ‘n linkervoorwiel afgelê en onmiddellik van die toneel weggehardloop.

“Ons het om 03:00 wakker geskrik van ’n harde slag en was teen 03:04 by die motorhuis. Die bestuurder was toe al skoonveld,” het Zee Pieterse, wat daar woon, aan die koerant gesê.

Lt. Linda Jerling, polisiewoordvoerder, het gesê die bestuurder kon nog nie opgespoor word nie.

“’n Klag van opsetlike saakbeskadiging word ondersoek. Ons hoop om die skuldige persoon gou vas te trek,” het sy gesê.

Pieterse het gesê ’n identiteitskaart met ’n personeelnommer daarop, is in die motor gevind.

Volg Nuus24 op Twitter 

- SAPA