Polisie ontstoke oor 'PigSpotter' op Twitter

2010-09-19 06:25

Johannes de Villiers

Johannesburg - Vir iemand wat ’n menigte gekrenkte en ontstoke Gautengse metropolisiebeamptes op sy spoor het, is Cliff “PigSpotter” verbasend maklik om op te spoor.

“Natuurlik is dit ’n bietjie kommerwekkend om ’n paar duisend polisiemanne agter jou aan te hê,” het die self­aan­gestelde Robin Hood van Suid-Afrika se paaie aan Rapport gesê toe hy per e-pos ondervra is.

“Maar ek is seker as hulle my wel vind en my in hegtenis neem, sal nie veel van hul dreigemente kan kom nie.”

Cliff (sy van en die res van sy identiteit is onbekend, maar hy noem homself PigSpotter) het ’n paar dae gelede nog stil-stil sy profiel op die sosiale netwerk Twitter gebruik om mense te waarsku waar die verkeerspolisie in Gauteng oral snelstrikke en padversperrings stel. Maar die afgelope week het hy skielik roem behaal.

Sy bedrywighede het die koerante gehaal, ’n paar duisend bykomende mense het begin om sy wenke op die internet te volg, en die Johannesburgse metropolisie het die naweek aangekondig dat hulle klagte van crimen injuria, naamskending en dwarsboming van die gereg teen hom aanhangig maak.

Dat hy op sy Twitter-profiel na die verkeerspolisie met allerlei bynaampies (wat gewoonlik die woord “vark” bevat) verwys, het nie veel gedoen om hul guns te wen nie.

“Drie klein varkies trek lukraak af op Christiaan de Wetweg naby die Clearwater Mall,” het hy byvoorbeeld Vrydag gewaarsku.

En ’n rukkie later: “Daar is ’n enorme MAMA met ’n blou City Golf wat graag agter die bosse en mure op Langermanweg, Kensington, wegkruip.”

Volgens van die aanhangers op PigSpotter se Twitter-profiel staan P.I.G vir “polisie in Gauteng”.

Toe Rapport supt. Wayne Minnaar, woordvoerder van die Johannesburgse metropolisie, gebel het, het hy nie dik van die lag geklink nie.

“Ons werk aan inligting,” was al wat hy wou sê.

Vroeër het hy egter aan die media gesê dié beledigings teen die polisie word in ’n ernstige lig beskou en hulle beoog om die oortreder vas te trek.

PigSpotter self was veel meer gesellig toe hy gekontak is.

Wat dink hy regtig van varke?

“Wel, ek eet hulle graag. Op ’n tyd het een in my huis rondgehardloop, maar hy het te groot geraak. Het lekker spek gemaak.”

Wat ’n mens veral laat kopkrap oor PigSpotter se bedrywighede, is waar hy al sy inligting bekom. Donderdag het hy byvoorbeeld binne ’n uur snelstrikke op die N14 naby Krugersdorp, die R21 noord van Johannesburg, William Nicolrylaan naby Sandton en die Delmas-pad verklap.

Hy hou vol hy kry die inligting van mense wat sy twiets volg.

“Ek sien hoe die polisie wegkruip en elke dag mense onwettig vang deur óf in ’n motor weg te kruip óf agter REGTIGE vet bome.

“Soos wat my volgelinge vermeerder het, so het meer van hulle gevra dat ek padversperrings ook dek, want vroue, veral saans, is afgetrek en geviktimiseer deur mense wat omkoopgeld wou hê. Dié soort korrupsie vind DAAGLIKS plaas. Pleks daarvan dat hulle iets goeds doen, probeer die polisie net geld maak uit onskuldige burgers.”

So gewild is hy dat daar reeds nabootsers in Kaapstad en Durban opgeduik het (Pig_SpotterCPT en PigSpotter_KZN onderskeidelik).

Maar nie een van dié twee kom al naby aan die sowat 14 000 volgelinge wat die oorspronk­like Pig­Spotter teen die naweek gehad het nie.

Maar is wat PigSpotter doen – om mense van die verkeerspolisie se snelstrikke te waarsku – wettig? Hy dink so.

As die polisie hom wil vervolg, “moet hulle bewys dat ek spesifieke padversperrings (se ligging) verklap, dat ek ’n spesifieke misdadiger bystaan en dat ek hom ’n ompad laat ry het wat hy nie andersins sou ry nie,” verduidelik hy.

“Ek skryf in die algemeen vir enigeen wat inligting oor snelstrikke en padversperrings wil hê; ek verskaf nie inligting aan enige spesifieke misdadiger of organisasie nie.As my optrede dwarsboming van die gereg is, moet iemand bewys dat ek aktief en doelbewus wenke aan ’n misdadiger verskaf.”

Volgens PigSpotter help hy mense om onwettige snelstrikke te vermy, maar wat is die verskil tussen ’n wettige en ’n onwettige snelstrik?

“Die polisie moet sigbaar wees. Die strik mag niks verder as 120?m wees van ’n teken wat die spoedgrens aandui en ’n prentjie van ’n kamera daaronder nie.

“Die strik moet op gelyke grond wees. En die kruisie op die foto moet na die nommerplaat wys.”

Mnr. Gary Ronald, AA-woordvoer, sê daar is egter ’n grys gebied as dit by die verklap van tydelike snelstrikke of padversperrings kom.

“As jy mense waarsku oor padversperrings waar die polisie mense se rybewyse nagaan of dronkbestuurders aankeer, beïnvloed jy die wetstoepassing.”

- Rapport

Gee jou mening oor hierdie gesprek - lewer hieronder kommentaar