Polisie ondersoek jeugliga-vuisgeveg
2011-12-13 16:52
Johannesburg - 'n Ondersoek is onderweg nadat lede van die ANC-jeugliga in 'n bakleiery by 'n kroeg in Seshego naby Polokwane betrokke was, het die polisie in Limpopo Dinsdag gesê.
Polisiewoordvoer Mothemane Malefo het gesê die voorval word ondersoek, maar niemand is in hegtenis geneem nie.
"Die saak word steeds ondersoek, maar ek het geen inligting verder nie," het hy gesê.
Die koerant The Star het Dinsdag berig dat verskeie van Julius Malema se "vennote", insluitende die jeugliga se provinsiale sekretaris, Jacob Lego, lede gekonfronteer het wat plakkate van Malusi Gigaba, minister van openbare ondernemings, naby die huis van Malema se ouma opgeplak het.
'n Vuisgeveg het toe tussen die mans en ondersteuners van die jeugliga se voormalige Limpopo-leier, Lehlogonolo Masoga, uitgebreek.
Masoga is verlede jaar deur Malema geskors, waarna hy in Oktober as adjunk-president van die ANC se Polokwane-tak aangewys is.
Malema se vennoot, Josias Buthane, het later een van Malema se mededingers raakgeloop en hom na bewering geklap, het die koerant berig.
Polokwane se ANC-sekretaris, Boiki Tsedu, en 'n ander lid, Pepe Chere, het opgedaag en toe glo 'n vuurwapen teen Buthane se voorkop gedruk.
"Selfs met 'n vuurwapen teen my voorkop het ek teen hulle baklei," het Buthane gesê.
Hy het later 'n klag teen Chere en Tsedu gelê.
Malema het aan die koerant gesê sy ouma het hom gebel om te kla dat mense besig was om voor haar huis te sing, maar het ontken dat hy mense gestuur het om lede van die jeugliga aan te val.
Volg Nuus24 op Twitter.