Interne ondersoek kom ná skok-video
2013-02-28 15:52
Johannesburg – Riah Phiyega, die nasionale polisiekommissaris, het Donderdag haar kommer uitgespreek oor 'n beweerde voorval van polisiewreedheid waarin ‘n taxi-bestuurder in Daveyton, oos van Johannesburg dood is.
“Die saak word deur die nasionale polisiekommissaris in 'n ernstige lig beskou en word ook ten sterkste veroordeel,” het brig. Phuti Setati, Phiyega se woordvoerder, gesê.
Mido Macia, ‘n Mosambiekse burger, is Dinsdagaand dood aangetref in die Daveyton-polisiestasie se aanhoudingselle ná hy glo agter aan 'n polisievangwa vasgemaak en deur 'n straat gesleep is.
Setati bevestig dat die voorval aan die Onafhanklike Polisie-ondersoekdirektoraat (Opod) gerapporteer is, en dat die polisie hul volle samewerking sal gee om te verseker dat geregtigheid geskied.
Phiyega het ook die waarnemende provinsiale kommissaris, maj.genl. Phumzo Gela, beveel om dadelik ‘n interne ondersoek van stapel te stuur.
Moses Dlamini, woordvoerder vir die Opod, het bevestig dat die saak ondersoek word.
Reggy Moalusi, adjunkredakteur van die Daily Sun, wat oorspronklik oor die gebeure berig het, het op die eNCA-kanaal verduidelik dat die voorval begin het toe 'n taxibestuurder aan die verkeerde kant van 'n straat geparkeer het.
"Die man het aan die verkeerde kant van die straat parkeer en hierdie twee polisiebeamptes was op patrollie, en hulle het sy taxi gesien.
"Toe die polisie hom genader het, het 'n bakleiery tussen hom en die beamptes begin," het Moalusi verduidelik.
Hy het beweer dat die man deur die straat gesleep is. Die slagoffer is later die aand dood weens kopbeserings.
"Hy is ongeveer 500 m ver gesleep."
Amnestie Internasionaal het die voorval as skokkend beskryf.
“Hierdie verskriklike voorval, wat buitensporige geweld behels, is die nuutste in ‘n rits ontstellende voorvalle waarin die Suid-Afrikaanse polisie wreed optree,” het Noel Kututwa, Amnestie Internasionaal se direkteur in Suider-Afrika, in ‘n verklaring gesê.
“Amnestie Internasionaal dring daarop aan dat die Suid-Afrikaanse regering ‘n openbare verbintenis maak om te verseker dat die polisie die gebruik van oormatige geweld en doelbewuste, geteikende moord, stopsit.”
– Kyk hier na 'n video van die voorval. [WAARSKUWING: Ontstellende beeldmateriaal]
– Volg Nuus24 op Twitter
- SAPA
