‘Polisie neem my kaal af’
2011-08-09 07:03
Johannesburg –Twee polisiemanne het ’n 23-jarige bemarkingskonsultant van Pretoria glo gedwing om kaal uit te trek sodat hulle foto’s van haar kon neem.
Toe sy vra hoekom sy haar onderklere moet uittrek, het een van hulle volgens Marina Kloppers gesê: “Tonight I am God.”
Sy het Maandag klagte teen die twee polisielede, vermoedelik van die Pretoria-Wes-polisiekantoor, aanhangig gemaak in verband met die voorval op 21 Julie.
Kloppers het dié oggend omstreeks 02:00 saam met Charise de Wit (22), ’n vriendin, in Mayville, Pretoria, gery.
Hulle het nie by ’n rooi verkeerslig stilgehou nie omdat hulle onveilig gevoel het, het Kloppers Maandag vertel.
Hulle het gesien ’n polisiemotor agtervolg hulle.
Dié motor het hulle van die pad probeer dwing. Toe die polisiemotor langs hulle was, het Kloppers gevra of hulle eerder na ’n veilige plek kan ry.
Toe hulle by ’n vriend se huis stilhou, het die polisielede haar uit die motor gepluk, op die grond neergegooi en oor die teerpad gesleep, het Kloppers gesê.
In ’n stadium het een van hulle bo-op haar gesit en sy gordel losgemaak om haar te boei.
Daarna is sy en De Wit agterin die vangwa geboender.
Die polisielede het langer as twee uur met hulle rondgery.
Uiteindelik is hulle na die Laudium-kliniek geneem.
Daar het ’n verpleegster bloed by De Wit getrek. Sy wou ook Kloppers se bloed trek, al was sy net die passasier.
Sy het aan die verpleegster gesê die polisiemanne het haar aangerand. Dié het gesê sy moet haar klere uittrek en toe met ’n digitale kamera foto’s van haar geneem.
Daarna het die verpleegster die polisiemanne geroep wat in die hospitaalkamer ingekom het terwyl sy net haar onderklere aangehad het. Een het gesê hy wil sien waar hy haar seergemaak het – sy moet haar onderklere ook uittrek.
Toe het hulle selfoonfoto’s van haar geneem, het Kloppers gesê. “Ek sal dit nooit in my lewe vergeet nie.”
Daarna is sy in die vangwa na die Pretoria-Wes-polisiekantoor geneem en in ’n sel gegooi.
Toe haar pa, Willem Kloppers, uitvoerende sporthoof van die Tshwane-Universiteit van Tegnologie, en vriende daar aankom, is hulle eers toegang tot haar geweier. Toe hulle uiteindelik by haar kom, was sy in ’n diabetiese koma.
Kloppers het na die Eugène Marais-hospitaal gejaag om vir haar medisyne te kry en het dit in die sel toegedien.
Sy het nie daarop gereageer nie. ’n Konstabel het toe aan hom gesê hy moet haar eerder net wegneem, hy sal verantwoordelikheid daarvoor neem as iemand vrae vra.
By die Eugène Marais-hospitaal het sy op die medisyne gereageer.
Sy is nooit van enige misdaad aangekla nie, het Kloppers gesê. Sedert die voorval ontvang sy sielkundige behandeling en drink sy antidepressante, anti-angsmiddels en slaappille.
“In die dag is dit fine, maar in die aand wanneer dit donker is, herleef ek die voorval weer.
“Ek sal nooit weer ’n polisieman kan vertrou nie.”
Sy was bang hulle sou haar verkrag, het sy gesê.
Kloppers het gesê: “Ek verstaan nie hoe enigiemand so iets aan ’n vrou kan doen nie.”
Ao. Annabel Middelton, polisiewoordvoerder, het gesê ’n saak van aanranding en onsedelike aanranding is by die Brooklyn-polisiekantoor teen die polisielede aanhangig gemaak.
Dit sal na die Pretoria-Wes-polisiekantoor oorgeplaas word. Brig. André Wiese, Brooklyn-stasiebevelvoerder, het gesê van sy kant af sal hy alles doen om te verseker dat dit reg ondersoek word.
Volg Nuus24 op Twitter.
- Beeld