Polisie moet man derduisende uitbetaal
2012-12-21 09:48
Johannesburg – 'n Hof in Port Elizabeth het die minister van polisie, Nathi Mthethwa, beveel om R110 000 aan 'n man te betaal vir die skending van sy privaatheid en ernstige aanranding.
Die bevinding hou verband met 'n saak wat betrekking het op Thobela Julius Funde, wie se huis vyf jaar gelede deur die polisie in Port Elizabeth deursoek is.
Funde is ook tydens die voorval deur twee polisiebeamptes aangerand, het die Star Vrydag berig.
Die beamptes beweer hulle het 'n klopjag uitgevoer nadat hulle 'n wenk ontvang het dat Funde dagga in die huis versteek.
Tydens die klopjag is sy vrou en kind na 'n ander kamer in die huis gestuur en Funde is geboei.
Een van die polisiemanne het 'n plastiekhandskoen oor Funde se kop getrek waarna hy sy bewussyn verloor het en later met water bygebring is.
Funde moes 'n langnaweek in die tronk deurbring en het toe 'n saak van aanranding by die polisie ingedien.
Die hof het Funde se weergawe van gebeure meer geloofwaardig gevind en bevind dat die beamptes se optrede 'n ernstige skending van privaatheid en 'n ernstige aanranding is.
Volg Nuus24 op Twitter.
- SAPA
