Polisie 'moet beter opgelei word'

2012-10-31 15:21

Johannesburg – Die Suid-Afrikaanse polisiediens moet beter opleiding verskaf aan polisiebeamptes wat openbare byeenkomste moet hanteer, het die Suid-Afrikaanse Menseregtekommissie  (SAMRK) Woensdag gesê.

Die kommissie se Danny Titus het dié aanbeveling gemaak as deel van die bevindings van 'n ondersoek na die dood van die betoger Andries Tatane van Ficksburg.

Die SAMRK het bevind dat die polisie uitermatige geweld op Tatane gebruik het, wat gelei het tot sy beserings en uiteindelike dood.

Die kommissie het gesê dat die polisie nie na wense toegerus was om die openbare onrus onder beheer te bring nie, en dat die beamptes nie met 'n goeie plan vorendag gekom het om die protesoptog te reguleer nie.

Tatane is dood tydens 'n diensleweringsbetoging in Ficksburg in April 2011.

Die polisie het ook versuim om 'n gekwalifiseerde en ervare lid aan te stel om hulle te verteenwoordig by onderhandelings gedurende die protesaksie.

"As 'n geskikte persoon gekies is, sou daardie persoon kon sien dat die protesoptog gewelddadig gaan raak, en behoorlik daarvoor voorberei," het die SAMRK gesê.

– Volg Nuus24 op Twitter.

- SAPA