Polisie met bakstene bestook by UWK
2010-08-24 06:54
Kaapstad – Vensters is gebreek, buitebande is aan die brand gesteek en die polisie is met bakstene bestook tydens nog ’n dag van betogings op die Universiteit van Wes-Kaapland se kampus.
’n Chaos het uitgebreek toe honderde studente weer eens betoog het omdat die die universiteit se bestuur volgens hulle nog nie gehoor gegee het aan al hul griewe oor finansiële bystand nie.
Die betoging het vreedsaam begin, maar nadat studente albei ingange na die universiteit versper het, het dinge begin handuit ruk. Die hoofingang en sekondêre ingang is vir langer as ’n halfuur versper.
Daar was meer as tien polisievoertuie op die toneel en ’n waterkanon is ingespan om die oproeriges te beheer. Twee vullisdromme is aan die brand gesteek.
Motors het van die ingang in Modderdamweg tot by die fakulteit lewenswetenskappe opgedam.
’n Motoris wat wou uitkom, het probeer om deur die skare te ry. Die studente het egter die motor gekeer en teen die vensters en bakwerk gekap.
Na dié voorval het die polisie by dié ingang opgedaag en die groep gevra om uit die pad te beweeg. Hulle het egter botweg geweier en die pad steeds versper.
Die polisiebeamptes moes rubberkoeëls uithaal voor die groep uitmekaargespat het.
Die polisie het tientalle van die studente in hegtenis geneem. Hulle wou egter nie sê waarheen die studente geneem sou word nie.
Teen laat gisteraand het die studente steeds luidkeels voor die polisievoertuie gesing.
Volg Nuus24 op Twitter.
- Die Burger