Polisie jok oor Marikana, sê oorlewende
2013-02-27 14:06
Video - Dramatiese getuienis oor Marikana
'n Mynwerker het dramatiese nuwe getuienis gelewer voor die Farlam-ondersoekkommissie oor die gebeure by Marikana verlede jaar.
KYK
Rustenburg – 'n Mynwerker wat die skietery by Marikana op 16 Augustus verlede jaar oorleef het, het aan die kommissie wat dié saak ondersoek gesê polisiebeamptes praat nie die waarheid oor die voorval nie.
Mzoxolo Magidiwana, 24, het na verskeie verklarings deur polisiebeamptes geluister waarin beweer word dat hy geskiet is ná hy self op die polisie losgebrand het.
Adv. Dali Mpofu, wat die mynwerkers verteenwoordig wat ná die voorval by Marikana in hegtenis geneem is, het die verklarings aan Magidiwana voorgelees en hom gevra om daarop te reageer.
“Dit is onsin,” het Magidiwana gesê.
Hy het aan die kommissie gesê hy het in sy hele lewe nog nooit 'n vuurwapen vasgehou nie, en weet ook nie hoe om een te gebruik nie.
Die polisie het getuig dat Magidiwana geskiet is in 'n poging om hom te ontwapen. Hy het na bewering 'n Z88-pistool met die embleem van die Suid-Afrikaanse polisiediens daarop in sy besit gehad.
Die polisie het hom in hegtenis geneem, maar kon hom nie aanhou nie weens sy erge beserings.
Magidiwana het in verskeie hospitale onder polisiebewaking aangesterk.
“Daardie saak pla my want ek weet nie eens hoe om 'n vuurwapen te gebruik nie. Die (polisie) het vals aantygings teen my gemaak. Ek het 'n swart knopkierie tydens die protesoptog gedra,” het Magidiwana gesê.
Altesaam 34 stakende mynwerkers is op 16 Augustus doodgeskiet en 78 beseer toe die polisie op 'n groep oproerige mynwerkers by 'n Lonmin-myn by Marikana geskiet het.
Tien mense, insluitend twee polisiebeamptes en twee veiligheidswagte, is in die week voor die skietery naby die myn dood.
– Volg Nuus24 op Twitter.
- SAPA
