Polisie in NK op soek na moordenaars
2012-06-13 22:05
Johannesburg – Die polisie in die Noord-Kaap was Woensdag nog op soek na die moordenaars van ‘n gay man in Kuruman.
Die man is nie onthoof soos vroeër berig is nie, het lt. kol. Mashay Gamieldien gesê.
“Die oorsaak van dood word nog vasgestel deur die lykskouing.”
Die 23-jarige Thapelo Makutle het na bewering Vrydag in ‘n argument met twee heteroseksuele mans betrokke geraak oor sy seksualiteit.
Gamieldien het gesê die 23-jarige is vroeg Saterdagoggend in sy gehuurde kamer gevind met ‘n wond aan sy nek.
“Niemand is nog in hegtenis geneem nie en die polisie is nog op soek na die verdagte of verdagtes.”
Hy is onlangs aangewys as Mej. Gay Kuruman en het ook deelgeneem aan die Kimberley Out In Africa Gay en Lesbiër Fees.
Lindiwe Mazibuko, die DA se parlementêre leier, het gesê die moord dien as herinnering dat baie Suid-Afrikaners steeds nie hul basiese regte en vryhede kan geniet nie. Sy het gesê verskeie haatmisdade teen gays en lesbiërs, soos “regstellende verkragting”, het oor die land heen plaasgevind. Pres. Jacob Zuma moet oor die man se moord en ander soos dit praat, het Mazibuko gesê.
Zuma se woordvoerder, Mac Maharaj, het gesê die regering se rekord van ondersteuning vir gender- en gay-regte is welbekend en om diskriminasie uit te roei is ‘n voortdurende proses.
“Ons neem enige gebeurtenis wat nie hierdie regte ondersteun nie, wat hierdie regte skend, as ‘n vlek op ons samelewing en dit moet teengestry word op elke vlak in ons samelewing,” het hy gesê.
- Volg Nuus24 op Twitter
- SAPA
