Polisie 'ignoreer' verkragting oor vervoer
2012-08-22 11:20
Johannesburg – Die polisie in Melmoth, KwaZulu-Natal, beweer hulle kon nie aandag gee aan ‘n klag van ‘n moontlike verkragting – wat een blok van hul polisiekantoor geleë was – nie, as gevolg van ‘n tekort aan vervoer, het ‘n koerant Woensdag berig.
The Witness berig Derek Horne, bestuurder van die Mthonjaneni-munisipaliteit se beskermingsdienste, het Saterdag twee meisies hoor skree en die polisie in kennis gestel.
Die plaaslike polisie sê hulle kon nie aandag aan die klag skenk nie, want ‘n polisievoertuig was nie beskikbaar nie.
Horne het glo vir die polisiekantoor gesê ‘n poging tot verkragting vind slegs ‘n blok van die polisiekantoor plaas, maar hy kon nie die polisie oorreed om die saak te ondersoek nie.
Hy het toe die meisies self gaan help.
“Ek het deur ‘n oop veiligheidshek in die rigting van die skreeue gestap en twee jong meisies gesien...” het hy vertel.
Horne vermoed die meisies is “omtrent 12 jaar en 16 jaar oud.”
Hy sê die meisies is aan vensters vasgebind en het toue om hul hande gehad.
“Twee jong mans het hulle probeer verkrag,” het hy gesê.
Horne het die getraumatiseerde meisies gehelp nadat die aanvallers weggehardloop het.
Kapt. Tienkie van Vuuren, woordvoerder vir die polisie in Eshowe, sê ‘n interne ondersoek sal van stapel gestuur word.
Volg Nuus24 op Twitter
- SAPA
