Polisie het my aangerand – Dewani-beskuldigde

2012-10-22 15:55

Kaapstad – 'n Man is glo aangerand om te erken dat hy die toeris Anni Dewani vermoor het, het die Wes-Kaapse hooggeregshof Maandag gehoor.

Xolile Mngeni (25), wat in sy eie verdediging getuig, het gesê hy is ná haar moord in November 2010 na die kelderverdieping van 'n polisiegebou geneem en erg aangerand.

"Hulle het my na 'n onderste verdieping geneem waar daar waterpype is. Daar was een tafel en een stoel en bloed op die vloer," het hy gesê.

"Hulle het my kop aan die agterkant van 'n stoel vasgemaak, 'n plastieksak geneem en pepersproei ingespuit. Hulle het dit op my gesig gesit en ek het vibreer asof ek 'n aanval kry. Die ander het my geskok en getrap."

Volgens Mngeni is sy klere toe uitgetrek en sy testikels teen ’n laai geslaan

Mngeni het onskuldig gepleit op aanklagte van roof, kaping en dat hy Dewani op 13 November 2010 in Gugulethu vermoor het.

Hy was die eerste getuie in die saak van die verdediging.

Regter Robert Henney het gevra hoekom hy nou eers oor die aanranding getuig. Hy het gesê die getuienis moes tydens die verhoor binne 'n verhoor bekendgemaak word om die toelaatbaarheid van Mngeni se bekentenis te bepaal.

Henney het beslis dat die verklaring as bewyse toegelaat kan word.

"Die hof kan dit nie ignoreer nie. Jy kan nie nou bewyse van die bekentenis voorlê nie."

Die verhoor duur voort.
       
– Volg Nuus24 op Twitter

- SAPA