Polisie het hom nie voorgetrek, sê Block
2010-11-11 09:00
Die Burger
Kimberley - Hy is in die polisieselle soos enige ander Suid-Afrikaner in aanhouding behandel, het John Block Woensdag hier buite die landdroshof gesê.
Block, Noord-Kaapse ANC-voorsitter en Noord-Kaapse LUR vir finansies, ekonomie en toerisme, het Woensdag voor die landdroshof kortliks aan uitbundige ondersteuners na sy aanhouding verwys.
Block en ’n medebeskuldigde, dr. Gaston Savoi (57), ’n skatryk sakeman van Uruguay, is voorwaardelik op borgtog van R100 000 vrygelaat.
“Die polisie het vir my gesê om ’n matras en ’n kombers te bring, want dit is nie in die sel nie. Ek het nie wegneemetes in die sel geniet nie. Dit is ongesond. My kos is by die huis berei en gestuur,” het Block Woensdag gesê.
“Dit was my reg dat kos aan my voorsien word, want ek is nie ’n gevangene nie.”
Hy het sewe nagte in ’n enkelsel in die Transvaalweg-polisiekantoor geslaap, waar hy sedert verlede week aangehou is.
“Ek het in die sel gestort en gewas. Sommige mense wat my wou besoek, is weggewys. Nie almal kan soontoe gaan nie.”
Patrick Mabilo, LUR vir vervoer en veiligheidskakeling, het Block aan die arm gehad toe hy deur ’n hek voor die hof ingekom het.
Ander hooggeplaastes het hom omring.
Block het gesê hy het homself aan die polisie oorgegee. Hy het nie weggehardloop nie.
“Ek is hier om my onskuld te verklaar. Watter uitspraak die hof ook al maak, ons moet dit gehoorsaam.”
Die meeste van die provinsie se LUR’e was soos die vorige dag weer Woensdag teenwoordig.
ANC-leiers van die verskillende streke het Woensdag in kort toesprake gesê hulle sal Block tot die bitter einde ondersteun.
Block, Savoi en nog sewe beskuldigdes is verlede week in verband met bedrog, korrupsie en geldwassery van meer as R40 miljoen aangekeer.
- Die Burger