Polisie gryp in by ASA
2009-11-17 08:39
Cobus Coetzee
Johannesburg-Die polisie is gister ontbied en slotte is by Atletiek Suid-Afrika (ASA) se hoofkantoor in Johannesburg vervang toe dié beleërde atletiekliggaam se uitvoerende hoof geweier het om sy pos te ontruim.
Molatelo Malehopo is vroeër die maand saam met Leonard Chuene, ASA-president, en vier senior bestuurders deur die Suid-Afrikaanse Sportkonfederasie en Olimpiese Komitee (Saskok) geskors, maar Malehopo het gistermiddag steeds geweier om dié skorsing te aanvaar.
Chuene was nie gister op kantoor nie.
Ray Mali, Saskok se afgevaardigde wat ASA sal bestuur, het om 10:50 by die kantore in Houghton opgedaag en met personeellede vergader.
Malehopo wou Mali eers keer om met ASA se finansiële bestuurders te praat, maar het later die perseel verlaat.
Hy het egter sy kantoor gesluit en Mali het ’n slotmaker ontbied om die kantoor weer oop te maak.
Volgens Mali het Malehopo enkele ure daarna wéér by die kantore opgedaag en probeer om by die agterdeur in te sluip. “Hy (Malehopo) het gesê sy regsadviseurs het hom aangeraai om nie die skorsing te aanvaar nie. Hy het gesê hy werk vir ASA en Saskok kan hom nie skors nie,” het Mali gesê.
Mali het die polisie ontbied, waarna hulle Malehopo by die kantore uitgehelp het en hy die kantoor se slotte laat vervang het.
’n Spesiale kennisgewing is gister aan ASA-personeel gestuur om geen dokumente uit die kantore te verwyder nie. Dit geld ook CD’s, DVD’s, skootrekenaars en enige ander eiendom. Mali het dié opdrag aanDie Burger bevestig.
Volgens hom sal tugstappe teen die geskorstes so gou moontlik afgehandel word. Geen geskorste sal in dié tyd naby die kantore toegelaat word nie.
Die Burger het verneem Chuene sukkel ook om Mali se oorname te aanvaar. Hy wil glo ’n hofbevel bekom wat Mali toegang tot ASA se kantore sal verbied. Saskok sal so ’n interdik-aansoek in die hof teenstaan.
Chuene het – voor Mali se oorname – reeds die notule vir ASA se spesiale ledevergadering eerskomende naweek in Kempton Park opgestel.
Volgens dié notule wou hy verseker Saskok se inmenging by ASA se bestuur asook die leierskap van ASA moet bespreek word. Dit is nie seker of Chuene nou by dié vergadering toegelaat sal word nie.
Mali het gister beklemtoon hy het Chuene en Malehopo se pligte oorgeneem.
Chris Britz en Hendrick Mokganyetsi van ASA se uitvoerende raad het intussen ook hul bedankings ingedien.
Dit beteken Chuene en die oorblywende lede van die “geskorste” raad is effektief nie meer ’n kworum nie.
Ziggy Mutungwa, voorsitter van die Suid-Afrikaanse Skole-atletiekvereniging, is ook gister deur sy raad geskors en sal voor ’n tugverhoor moet verskyn.
Koos Engelbrecht, voorsitter van die Suid-Afrikaanse Vereniging van Gestremde Sport, het sy steun by Saskok gevoeg.
Mali hoop om vertroue tussen ASA, borge, die atlete en die Internasionale Vereniging van Atletiekfederasies (IAAF) te herstel.
Die IAAF gaan nie meer soos verwag die naweek Caster Semenya se gender-toetsuitslae aan haar bekend maak nie. Dit sal glo later gedoen word.
- Die Burger