Omstrede onderwêreld-lid sterf in koeëlreën
2011-03-22 08:35
Bellville - Een van die mees omstrede figure in die Kaapse onderwêreld, Cyril Beeka (49), is laat Maandagmiddag in Modderdamweg, naby die Universiteit van Wes-Kaapland (UWK), in ’n vermeende sluipmoord doodgeskiet.
Hy was die bestuurder van ’n grys BMW X5. Sy passasier was ’n Rus, Sasa Kovasevic (36).
Twee mense het omstreeks 17:00 op ’n motorfiets tot langs die BMW gery, daarop losgebrand en weggejaag.
Die motor het van die pad geloop, deur ’n heining gebars en op sy sy geland.
Kapt. Joe Wilson, Delft-polisiewoordvoerder, het op die toneel gesê die motief is onbekend, maar alle moontlikhede word ondersoek.
Volgens Keri Davids, woordvoerder van die Metro-nooddienste, is die bestuurder in die kop geskiet. Hulle het langer as ’n uur gesukkel om Beeka se lyk uit die voertuig los te kry.
Edward Beeka, broer van die oorledene, het op die toneel gesê hy is gebel om soontoe te kom. Hy het gesien hoe hulle sy broer se lyk uit die voertuig haal. Cyril Beeka het nie meer in die Kaap gebly nie en was hier op besigheid.
“Ek het volle vertroue in die regstelsel en die polisie dat daar binnekort mense in hegtenis geneem sal word. My ma is al oud, maar ek glo sy het die krag om hierdeur te kom.”
Mo Shaik, wat glo bande met Beeka gehad het, het telefonies aan Die Burger gesê hy het gehoor van sy dood. “Ek is hartseer en my gedagtes is met sy familie – veral sy vrou en jong kinders.”
Op ’n vraag hoe lank hulle mekaar geken het, was sy antwoord: “Ek gaan nie sulke tipe vrae beantwoord nie.”
Shaik en Beeka het in 2007 saam by die ANC se konferensie in Polokwane opgedaag.
Beeka laat sy vrou, Sonia, agter asook drie dogters, waarvan die oudste Vrydag 21 jaar oud word.
Van uitsmyters en gesellinklubs tot Polokwane
Cyril Beeka, ’n voormalige MK-kader, was ’n omstrede figuur wat ook ’n bekende gesig in die Kaapse howe was.
- In 1994 het Beeka ’n verdagte in ’n moordsaak by die hof met die vuiste bygedam. Dié man het na bewering twee van Beeka se werknemers by sy sekerheidsmaatskappy, Pro Security, geskiet. Dié sakeonderneming, en later ook Red Security, is met die uitsmyterbedryf verbind.
- In 1998 het die geskorste hoof van die presidentstaakspan van die polisie in die Wes-Kaap, dir. André Lincoln, ’n klag van intimidasie teen Beeka en die omstrede Sisiliaanse sakeman Vito Palazzolo ingedien.
- In 1999 is hy saam met twee ander mans aangekeer nadat ’n vrou buite ’n gesellinklub aangerand is. Die vrou moes in die getuiebeskermingsprogram opgeneem word en die saak is herhaaldelik uitgestel.
- Beeka en vyf ander mans is in September 2000 in die Kaapstadse streekhof vrygespreek op aanklag van die moord op ’n Chinese matroos, Hong Liang Wu (23), buite die karaoke-kroeg Saigon in Langstraat.
- Beeka was na bewering ’n informant vir die intelligensiedienste van die Nasionale Party, en later ook vir die ANC.
- Die Skerpioene het in 2002 Beeka se onderneming Red Security in Loopstraat deursoek. Vragte dokumente en rekenaars is verwyder.
- Tydens die ANC se konferensie in Polokwane in 2007 is daar in SMS’e beweer mnre. Mo Shaik en Beeka is die eienaars van The Elexions Agency, wat die stemproses beheer het. Hulle het saam daar opgedaag. Nog een het beweer dat Shaik en Beeka ’n belang het in die maatskappy wat die sekerheid by die konferensie verskaf en die stemlokaal beveilig het.
- Hy was ook bevriend en het sake gedoen met Yuri (die Rus) Ulianitski, wat in 2007 by Woodbridge-eiland in sy Audi Q7 doodgeskiet is. Hulle het in die jare negentig saam nagklubs in Kaapstad besit.
- Die Tsjeggiese voortvlugtende Radowan Krejcir het by geleentheid gesê hy en Beeka is vriende. The Star het vroeër berig Beeka het glo gesê hy het George Louca (alias George Smith), wat verdink word van die moord op Teazers se eienaar, Lolly Jackson, die aand van die moord gesien.
- Die Mail & Guardian berig Beeka se naam word verbind met die moord verlede jaar op die bekende Duitse sportmotor-opknapper Uwe Gemball wat by die O.R. Tambo-lughawe deur iemand opgelaai is. Sy lyk is in Atteridgeville, wes van Pretoria, gegooi.
- Die Burger