Platsak pasiënt steel glo ambulans
2010-05-01 15:00
Johannesburg - 'n Pasiënt by Kopanong Hospitaal, Vereeniging, het na bewering Saterdag 'n ambulans gesteel omdat hy nie geld gehad het vir 'n taxi huis toe nie.
Volgens ER24 se Werner Vermaak het paramedici rondom 04:00 'n beseerde man na die hospitaal geneem vir behandeling.
Die nooddienswerkers het hul ambulans in die hospitaal se parkeerarea gelos.
Toe hulle egter 20 minute later na die terrein terugkeer, was die voertuig soek.
Een van die paramedici het die gebou se sekuriteitspersoneel konfronteer en 'n wag het aan hom gesê 'n man met 'n verband om sy kop het in die ambulans geklim en gery.
"Die pasiënt het glo vir die sekuriteitswag gesê hy wou huis toe gaan, maar het nie geld vir 'n taxi nie," het Vermaak gesê.
Na bewering het 'n wag die hek buite die parkeerterrein vir die ambulans oopgemaak.
Lede van die polisie en paramedici het die voertuig later voor 'n huis in Springcole gekry.
"Die voertuig het nog geluier en die ligte was aan," het Vermaak gesê.
Daar was egter niemand in die huis nie.
Niks is uit die ambulans gesteel nie.
Die polisie ondersoek die voorval.
- Sapa
Volg Nuus24 op Twitter.