Plaaswerkerstaking opgeskort – Cosatu
2013-01-16 18:01
Fotogalery - Plaaswerkerstaking duur voort
klik op klein foto bo om groter prentjie te sien
Kaapstad – Die Congress of SA trade Unions (Cosatu) het Woensdag gesê dat die Wes-Kaapse plaaswerkerstaking vir ‘n week opgeskort is, het eNCA berig.
Dit sal onmiddellik van effek wees.
Cosatu wil hê boere moet ‘n ooreenkoms bereik gebaseer op ‘n ooreenkoms wat Dinsdag in Clanwilliam bereik is.
Cosatu sê boere in Clanwilliam het ingestem om R105 ‘n dag aan plaaswerkers te betaal.
Tony Ehrenreich, Wes-Kaapse Cosatu-sekretaris, sê dit is ‘n voorbeeld van ‘n ooreenkoms wat in ander dorpe gebruik kan word om die staking, wat soms met geweld gepaard gegaan het, moontlik tot ‘n einde te bring.
Nietemin het beide Agri SA en Agri Wes-Kaap Woensdagoggend gesê hulle is nie deur Cosatu gekontak rakende ‘n plan om die loonooreenkoms uit te brei nie.
Porschia Adams, woordvoerder van Agri Wes-Kaap, sê sover sy weet het slegs een boer wat ‘n paar plase besit ‘n loonooreenkoms bereik en nie verskeie boere nie.
Johannes Muller, president van Agri SA, het later ‘n verklaring uitgereik waarin hy gesê het geen landbou-loonooreenkoms is nog in die land bereik nie.
“’n Aanbod wat deur ‘n enkele boer [van Clanwilliam] gemaak is, wat glo baie afhanklik is van die dienste van ‘n groot hoeveelheid tydelike werkers tydens oestyd, is deur Cosatu verwelkom en hulle het dit laat lyk na ‘n gesamentlike ooreenkoms met boere van Clanwilliam wat gebruik kan word as ‘n voorbeeld wat wyer toegepas kan word,” het hy gesê.
Hy sê die aanbod is glo nie ondersteun as ‘n kollektiewe ooreenkoms deur ander leiers en hul organisasies in die omgewing nie.
– Volg Nuus24 op Twitter
